Shirdi Crime | पोलीस असल्याची बतावणी करत तरुणीवर अत्याचार; अश्लील फोटो व्हायरलची धमकी, आरोपी फरार

नाशिक जिल्ह्यातील नांदगाव येथे एका 20 वर्षीय महाविद्यालयीन तरुणीवर पोलीस असल्याची खोटी बतावणी (Fake Cop Rape Case) करत वारंवार अत्याचार केल्याची धक्कादायक घटना उघडकीस आली आहे. संबंधित तरुणीचे अश्लील फोटो आणि व्हिडीओ व्हायरल करण्याची धमकी देत आरोपीने तिचे मानसिक, शारीरिक आणि भावनिक शोषण केल्याचा आरोप असून या प्रकरणामुळे नाशिक जिल्ह्यात खळबळ (Shirdi Lodge Crime) उडाली आहे. संदीप कौतिक बेंडके असे आरोपीचे नाव असून तो सध्या फरार आहे. पोलिसांनी त्याच्या शोधासाठी विशेष पथके रवाना केली आहेत.

या प्रकरणातील पीडित तरुणी नांदगाव येथे महाविद्यालयीन शिक्षण घेत आहे. फिर्यादीनुसार, काही महिन्यांपूर्वी तिचे ओळखपत्र हरवले होते. हे ओळखपत्र परत देण्याच्या बहाण्याने आरोपी संदीप बेंडके याने तिच्याशी संपर्क साधला. सुरुवातीला मदतीचा आव आणत त्याने तरुणीचा विश्वास संपादन केला. त्यानंतर आपण उच्चशिक्षित असून पोलीस विभागात कार्यरत असल्याचे सांगत त्याने तरुणीशी जवळीक वाढवली.

विश्वासात घेतल्यानंतर आरोपीने तरुणीला वेगवेगळ्या कारणांनी (Police Name Misuse) भेटण्यासाठी बोलावण्यास सुरुवात केली. काही दिवसांनी त्याने तरुणीला शिर्डीतील नवीन पिंपळवाडी रोडवरील साईसमर्थ लॉज (Shirdi Sai Samarth Lodge) येथे नेले. तेथे तिच्यावर जबरदस्तीने अत्याचार केल्याचा आरोप फिर्यादीत करण्यात आला आहे. यावेळी आरोपीने पीडित तरुणीचे काही अश्लील फोटो आणि व्हिडीओ मोबाईलमध्ये चित्रित केले.

यानंतर हे फोटो आणि व्हिडीओ सोशल मीडियावर व्हायरल करण्याची धमकी देत आरोपीने तरुणीला सतत ब्लॅकमेल केले. “तू कोणालाही सांगितले तर तुझे आयुष्य उद्ध्वस्त करीन,” अशी धमकी देत आरोपीने तिच्यावर वारंवार अत्याचार केल्याचे तक्रारीत नमूद करण्यात आले आहे. आरोपीच्या भीतीमुळे आणि बदनामीच्या धास्तीने पीडित तरुणी अनेक महिने गप्प राहिली.

फिर्यादीनुसार, ९ नोव्हेंबर २०२५ ते १६ मार्च २०२६ या कालावधीत आरोपीने शिर्डी, येवला, नांदगाव आणि नाशिक रोड परिसरात वेगवेगळ्या ठिकाणी पीडितेवर अत्याचार केले. एवढेच नव्हे तर, पीडितेच्या आई-वडिलांनाही आत्महत्या करण्यास भाग पाडेल, अशा स्वरूपाच्या धमक्या आरोपी देत असल्याचा गंभीर आरोपही तक्रारीत करण्यात आला आहे. त्यामुळे पीडित तरुणी आणि तिच्या कुटुंबावर मोठा मानसिक ताण निर्माण झाला होता.

अखेर आरोपीच्या सततच्या त्रासाला कंटाळून संबंधित तरुणीने धाडस करत नांदगाव पोलीस ठाण्यात तक्रार दाखल केली. तक्रारीनंतर पोलिसांनी तत्काळ गुन्हा नोंदवत तपास सुरू केला आहे. बलात्कार, धमकी आणि माहिती तंत्रज्ञान कायद्यांतर्गत विविध कलमांन्वये आरोपीविरुद्ध गुन्हा दाखल करण्यात आला असल्याची माहिती पोलिसांनी दिली आहे.

या प्रकरणाच्या तपासासाठी नांदगाव पोलिसांनी शिर्डीतील साईसमर्थ लॉज येथे भेट देत फॉरेन्सिक पथकाच्या मदतीने तपासणी केली. लॉजमधील सीसीटीव्ही फुटेज, नोंदवही, मोबाईल डेटा तसेच इतर तांत्रिक पुरावे पोलिसांकडून तपासले जात आहेत. पोलिसांनी संबंधित लॉज व्यवस्थापनाचीही चौकशी केली असल्याची माहिती समोर आली आहे.

दरम्यान, गुन्हा दाखल होताच आरोपी संदीप बेंडके फरार झाला आहे. त्याच्या शोधासाठी पोलिसांनी विविध ठिकाणी पथके पाठवली असून नाशिक, शिर्डी, येवला आणि आसपासच्या भागात शोधमोहीम सुरू आहे. आरोपीचा मोबाईल लोकेशन, कॉल रेकॉर्ड आणि इतर तांत्रिक माहितीच्या आधारे तपास सुरू असल्याचे पोलिसांनी सांगितले.

या घटनेमुळे परिसरात संताप व्यक्त केला जात आहे. सोशल मीडियावरही या प्रकरणाची जोरदार चर्चा सुरू असून आरोपीला तातडीने अटक करून कठोर कारवाई करण्याची मागणी होत आहे. महिलांच्या सुरक्षेचा प्रश्न पुन्हा एकदा ऐरणीवर आला असून, बनावट ओळख सांगून महिलांची फसवणूक करणाऱ्या अशा घटनांविरोधात कठोर उपाययोजना करण्याची मागणी नागरिकांकडून होत आहे.

पोलीस असल्याची खोटी बतावणी करून विश्वास संपादन करणे, त्यानंतर ब्लॅकमेल करत अत्याचार करणे आणि अश्लील फोटो-व्हिडीओच्या माध्यमातून मानसिक दबाव टाकणे, या प्रकारामुळे तरुणींनी सोशल मीडियावरील ओळखी आणि अनोळखी व्यक्तींशी संपर्क करताना अधिक सतर्क राहण्याची गरज व्यक्त केली जात आहे.

या संपूर्ण प्रकरणाबाबत नांदगाव पोलीस ठाण्याचे सहाय्यक पोलीस निरीक्षक सुनील बडे यांनी माहिती देताना सांगितले की, “पीडित तरुणीच्या तक्रारीवरून गुन्हा दाखल करण्यात आला आहे. तपास सुरू असून आरोपीचा शोध घेण्यासाठी पथके रवाना करण्यात आली आहेत. फॉरेन्सिक तपासणीसह सर्व तांत्रिक बाबींचा तपास केला जात आहे.” सध्या या प्रकरणाचा तपास नांदगाव पोलीस करत असून आरोपीला अटक झाल्यानंतर आणखी धक्कादायक माहिती समोर येण्याची शक्यता व्यक्त केली जात आहे.