श्रीरामपूर : अहिल्यानगर जिल्ह्यात अंधश्रद्धेच्या नावाखाली सुरू असलेल्या फसवणुकीच्या प्रकारांमध्ये आणखी एका धक्कादायक प्रकरणाची भर पडली आहे. श्रीरामपूर तालुक्यातील टाकळीभान येथील अशोक मधुकर आढाव या भोंदू बाबाला श्रीरामपूर तालुका पोलिसांनी अटक केली असून, एका महिलेची आर्थिक तसेच शारीरिक फसवणूक केल्याचा गंभीर आरोप त्याच्यावर करण्यात आला आहे. “तुला भूतबाधा झाली आहे” अशी भीती दाखवत आरोपीने संबंधित महिलेकडून रोख रक्कम आणि सोन्याचे दागिने उकळल्याचे समोर आले आहे. इतकेच नव्हे, तर महिलेचा विनयभंग करण्याचाही प्रयत्न आरोपीने केल्याचा आरोप तक्रारीत करण्यात आला आहे.
मिळालेल्या माहितीनुसार, पीडित महिला काही वैयक्तिक अडचणी आणि मानसिक तणावातून जात होती. त्याच काळात 2023 मध्ये तिची ओळख टाकळीभान येथील अशोक आढाव याच्याशी झाली. गावात स्वतःला धार्मिक शक्ती लाभलेला व्यक्ती म्हणून सादर करणाऱ्या आढावने महिलेला “तुझ्यावर वाईट शक्तींचा प्रभाव आहे”, “भूतबाधा झाली आहे” अशी भीती दाखवली. या भीतीचा फायदा घेत त्याने विविध पूजा, विधी आणि उपचारांच्या नावाखाली महिलेची आर्थिक फसवणूक सुरू केल्याचा आरोप आहे.
तक्रारीनुसार, आरोपीने महिलेकडून वेळोवेळी रोख रक्कम घेतली तसेच सोन्याचे दागिनेही स्वतःकडे जमा करून घेतले. हे सर्व प्रकार गुप्त धार्मिक विधी आणि बाधा दूर करण्याच्या नावाखाली सुरू होते. आरोपीने महिलेला मानसिकदृष्ट्या पूर्णपणे घाबरवून ठेवत तिच्यावर प्रभाव निर्माण केला होता, अशी माहिती तपासात पुढे येत आहे.
दरम्यान, 2025 मध्ये आरोपीने संबंधित महिलेचा विनयभंग करण्याचाही प्रयत्न केल्याचे तक्रारीत नमूद करण्यात आले आहे. या प्रकारानंतर महिलेने धाडसाने पुढे येत श्रीरामपूर तालुका पोलीस ठाण्यात तक्रार दाखल केली. तक्रारीनंतर पोलिसांनी तत्काळ हालचाली करत आरोपीविरोधात महाराष्ट्र नरबळी आणि इतर अमानुष, अनिष्ट व अघोरी प्रथा व जादूटोणा प्रतिबंधक कायद्यान्वये गुन्हा दाखल केला. याशिवाय फसवणूक आणि विनयभंगाशी संबंधित कलमांचाही समावेश करण्यात आल्याची माहिती सूत्रांनी दिली.
श्रीरामपूर तालुका पोलिसांनी आरोपी अशोक आढाव याला अटक करून न्यायालयात हजर केले असता न्यायालयाने त्याला दोन दिवसांची पोलीस कोठडी सुनावली आहे. या काळात आरोपीकडून आणखी काही महिलांची फसवणूक झाली आहे का, आर्थिक व्यवहार किती झाले, तसेच त्याच्या संपर्कात आणखी कोण कोण होते याचा तपास पोलिसांकडून केला जाणार आहे.
या घटनेमुळे परिसरात मोठी खळबळ उडाली असून, अंधश्रद्धेच्या नावाखाली लोकांची मानसिक आणि आर्थिक लूट कशी केली जाते, याचे हे आणखी एक उदाहरण समोर आले आहे. गेल्या काही महिन्यांत अहिल्यानगर जिल्ह्यात भोंदूबाबा, जादूटोणा, भूतबाधा आणि धार्मिक उपचारांच्या नावाखाली फसवणुकीच्या अनेक घटना उघड झाल्या आहेत. त्यामुळे अशा प्रकारांविरोधात कठोर कारवाई करण्याची मागणी नागरिकांकडून होत आहे.
अंधश्रद्धा निर्मूलन कार्यकर्त्यांनीही या घटनेबाबत तीव्र प्रतिक्रिया व्यक्त केली आहे. समाजातील भीती, अज्ञान आणि मानसिक तणावाचा गैरफायदा घेत काही भोंदूबाबा लोकांची फसवणूक करत असल्याचे त्यांनी म्हटले आहे. विशेषतः महिलांना लक्ष्य करून अशा प्रकारचे गुन्हे वाढत असल्याने समाजाने जागरूक राहण्याची गरज असल्याचेही त्यांनी स्पष्ट केले. दरम्यान, पोलिसांनी नागरिकांना आवाहन करताना सांगितले की, कोणत्याही प्रकारच्या भूतबाधा, जादूटोणा किंवा चमत्काराच्या नावाखाली पैसे उकळणाऱ्या व्यक्तींवर विश्वास ठेवू नये. संशयास्पद प्रकार आढळल्यास तातडीने पोलिसांशी संपर्क साधावा. सध्या या प्रकरणाचा पुढील तपास श्रीरामपूर तालुका पोलीस करत आहेत.
