अजित पवार विमान अपघात प्रकरण : महादेव जानकर एका मिनिटांनी वाचले?

पुणे : उपमुख्यमंत्री अजित पवार यांच्या विमान अपघातातील अकाली निधनानं संपूर्ण महाराष्ट्र शोकसागरात बुडाला आहे. या भीषण अपघातानंतर राज्यभरातून हळहळ व्यक्त केली जात असतानाच, अपघाताबाबत दररोज नवनवीन आणि धक्कादायक माहिती समोर येत आहे. या अपघाताने केवळ एक नेता नाही, तर महाराष्ट्राच्या राजकारणातील एक प्रभावी नेतृत्व हरपल्याची भावना सर्वत्र व्यक्त केली जात आहे.

अपघातानंतर पवार कुटुंब एकत्र

अजित पवार यांच्या निधनानंतर संपूर्ण पवार कुटुंब एकत्र दिसून आले. त्यानंतर सुनेत्रा पवार यांनी उपमुख्यमंत्रिपदाची शपथ घेत पक्षाची धुरा आपल्या हातात घेतली. या घडामोडींमुळे राज्याच्या राजकारणात मोठे बदल घडताना दिसत आहेत.

एकाच विमानातून जाणार होता आणखी एक मोठा नेता

दरम्यान, या अपघातासंदर्भात एक खळबळजनक माहिती समोर आली आहे. अजित पवार ज्या विमानाने मुंबईहून बारामतीकडे रवाना झाले होते, त्याच विमानातून राज्यातील आणखी एक मोठा नेता प्रवास करणार होता, अशी माहिती पुढे आली आहे.

महादेव जानकर यांचा धक्कादायक दावा

राष्ट्रीय समाज पक्षाचे अध्यक्ष महादेव जानकर यांनी याबाबत महत्त्वाचा खुलासा केला आहे.
जानकर यांनी सांगितले की, “ज्या दिवशी अजित पवार यांचा भीषण विमान अपघात झाला, त्या दिवशी मी देखील त्यांच्यासोबत त्याच विमानाने बारामतीला जाणार होतो. अजित पवार यांनी मला स्वतः निमंत्रण दिले होते. मात्र, मला विमानतळावर पोहोचायला उशीर झाला. विमान ठरलेल्या वेळेत निघून गेलं आणि त्यामुळे माझा प्रवास रद्द झाला.”

जानकर पुढे म्हणाले, “माझ्या उशिरामुळे माझा जीव वाचला, पण राज्याने एक मोठा आणि प्रभावी नेता गमावला, ही खंत कायम राहील.”

विमानात नेमके किती जण होते?

अजित पवार यांच्या अपघातानंतर विमानात नेमके किती लोक होते, यावरून मोठा संभ्रम निर्माण झाला आहे.
विमान कंपनीकडून देण्यात आलेल्या माहितीनुसार, विमानात एकूण ५ जण होते. दोन पायलट, अजित पवार, एक एअर होस्टेस, अजित पवार यांचा अंगरक्षक मात्र, काही राजकीय नेत्यांनी या विमानात ६ प्रवासी असल्याचा दावा केल्याने वाद निर्माण झाला आहे.

प्रत्यक्षदर्शी सरपंचाचा खुलासा

या प्रकरणात आता प्रत्यक्षदर्शी आणि गोजुबावी गावचे सरपंच कल्याण आटोळे यांनी महत्त्वाची माहिती दिली आहे. त्यांनी अपघाताच्या क्षणांचे वर्णन करताना अनेक शंका उपस्थित केल्या असून, त्यांच्या माहितीनंतर या अपघाताबाबतचे गूढ आणखी गडद झाले आहे.

चौकशीकडे सर्वांचे लक्ष

दरम्यान, अजित पवार यांच्या विमान अपघाताबाबत सखोल चौकशीची मागणी जोर धरू लागली आहे. अपघात नेमका कसा झाला, तांत्रिक बिघाड होता की मानवी चूक, याबाबत लवकरच सत्य समोर येईल, अशी अपेक्षा व्यक्त केली जात आहे.